Young Allan

No: 245; variant: 245C

  1. ALL the skippers o Scarsburgh Sat drinking at the wine; There fell a rousing them amang, On an unseally time.
  2. Some there rousd their hawk, their hawk, And some there rousd their hound, But Young Allan rousd his comely cog, As she stood on dry ground.
  3. ‘There’s nae a ship in Scarsburgh Will sail the seas wi mine, Except it be the Brugess Black, Or than the smack calld Twine.
  4. ‘There’s nae a ship amang you a’ Will sail alang wi me, But the comely cog o Hecklandhawk, And Flower o Yermanie, And the Black Snake o Leve London; They are a’ gane frae me.’
  5. Out it speaks a little wee boy Stood by Young Allan’s knee; ‘My master has a coal-carrier Will take the wind frae thee.
  6. ‘She will gae out under the leaf, Come in under the lee, And nine times in a winter night She’ll turn the wind wi thee.’
  7. When they had wagerd them amang Full fifty tuns o wine, Besides as mickle gude black silk As clathe their lemans fine,
  8. When all the rest went to the tows, All the whole night to stay, Young Allan he went to his bower, There with his God to pray.
  9. ‘There shall nae man gang to my ship Till I say mass amd dine, And take my leave o my lady; Gae to my bonny ship syne.’
  10. Then they saild east on Saturday, On Sunday saile:d west, Likewise they sailed on Mononday Till twelve, when they did rest.
  11. At midnight dark the wind up stark, And seas began to rout, Till Allan and his bonny new ship Gaed three times witherlands about.
  12. ‘O,’ sighing says the Young Allan, ‘I fear a deadly storm; For mony a heaving sinking sea Strikes sair on my ship’s stern.
  13. ‘Where will I get a little wee boy Will take my helm in hand Till I gang up to my tapmast And see for some dry land?’
  14. ‘O waken, waken your drunken men, As they lye drunk wi wine; For when ye came thro Edinbro town Ye bought them sheen o ben.
  15. ‘There was nae shoe made for my foot, Nor gluve made for my hand; But nevertheless, my dear master, I’ll take your helm in hand Till ye gang to the tall tapmast And look for some dry land.
  16. ‘And here am I, a little wee boy Will take your helm in han Till ye gang up to your tapmast, But, master, stay not lang.’
  17. ‘I cannot see nae day, nae day, Nor nae meathe can I ken; But mony a bonny feather-bed Lyes floating on the faem, And the comely cog o Normanshore, She never will gang hame.’
  18. The comely cog o Nicklingame Came sailing by his hand; Says, Gae down, gae down, ye gude skipper, Your ship sails on the sand.
  19. ‘Come down, come down, my gude master, Ye see not what I see; For thro and thro our comely cog I see the green haw sea.’
  20. ‘Take fifty ells o gude canvas And wrap the ship a’ round; And pick her weell, and spare her not, And make her hale and sound.
  21. ‘If ye will sail, my bonny ship, Till we come to dry land, For ilka iron nail in you, Of gowd there shall be ten.’
  22. The ship she listend all the while, And, hearing of her hire, She flew as swift threw the saut sea As sparks do frae the fire.
  23. The first an shore that they came till, They ca’d it Howdoloot; Wi drums beating and cannons shouting, They held our gude ship out.
  24. The next an shore that they came till, They ca’d it Howdilee; Wi drums beating and fifes playing, They bare her to the sea.
  25. The third an shore that they came till, They ca’d it Howdilin; Wi drums beating and pipes playing, They towd our gude ship in.
  26. The sailors walkd upon the shore, Wi their auld baucheld sheen, And thanked God and their Lady, That brought them safe again.
  27. ‘For we went out o Scarsburgh Wi fifty ships and three; But nane o them came back again But Young Allan, ye see.’
  28. ‘Come down, come down, my little wee boy, Till I pay you your fee; I hae but only ae daughter, And wedded to her ye’se be.’