The Laird of Logie

No: 182; variant: 182D

  1. PRETTY is the story I hae to tell, Pretty is the praisin o itsel, An pretty is the prisner oor king’s tane, The rantin young laird o Logie.
  2. Has he brunt? or has he slain? Or has he done any injurie? Oh no, no, he’s done nothing at all, But stown a kiss frae the queen’s marie.
  3. Ladie Margaret cam doon the stair, Wringin her hands an tearin her hair; Cryin, Oh, that ever I to Scotland cam, Aye to see Young Logie dee!
  4. ‘Had your tongue noo, Lady Margaret, An a’ your weepin lat a bee! For I’ll gae to the king my sell, An plead for life to Young Logie.’
  5. ‘First whan I to Scotland cam, You promised to gie me askens three; The first then o these askens is Life for the young laird o Logie.’
  6. ‘If you had asked house or lands, They suld hae been at your command; But the morn, ere I taste meat or drink, High hanged sall Young Logie be.’
  7. Lady Margaret cam doon the stair, Wringin her hands an tearin her hair; Cryin, Oh, that ever I to Scotland cam, A’ to see Young Logie dee!
  8. ‘Haud your tongue noo, Lady Margaret, An a’ your weepin lat a bee! For I’ll counterfiet the king’s hand-write, An steal frae him his right-hand gloe, An send them to Pitcairn’s wa’s, A’ to lat Young Logie free.’
  9. She counterfieted the king’s hand-write, An stole frae him his richt hand gloe, An sent them to Pitcairn’s wa’s, A’ to let Young Logie free.
  10. The king luikit owre his castle-wa, Was luikin to see what he cald see: ‘My life to wad an my land to pawn, Yonder comes the young laird o Logie!’
  11. ‘Pardon, oh pardon! my lord the king, Aye I pray you pardon me; For I counterfieted your hand-write, An stole frae you your richt hand gloe, An sent them to Pitcairn’s wa’s, A’ to set Young Logie free.’
  12. ‘If this had been done by laird or lord, Or by baron of high degree, I’se mak it sure, upon my word, His life suld hae gane for Young Logie.
  13. ‘But since it is my gracious queen, A hearty pardon we will gie, An for her sake we’ll free the loon, The rantin young laird o Logie.’